13. (1) MEMBRUM.
(2) Membrum orationis vocatur res breviter absoluta sine totius
sententie demonstratione, que aliud membrum orationis denuo
cognoscitur expectare. (3) Hoc autem ex coniunctione provenit
anteposita que de necessitate aliam orationem requirit,
hoc modo: 'Et inimico proderas et amicum ledebas'. (4) Illa
tamen est comodissima exornatio que continet tria membra, hoc
modo: 'Et Deum cum devotione oras et pia manu pauperibus
benefacis et instanter superbiam carnis domas'. (5) Et colon
grece dicitur iste color.
14. (1) ARTICULUS.
(2) Articulus dicitur cum, cesa oratione, quibusdam distinguntur
verba singula intervallis, (3) hoc modo: 'Fides, spes, caritas
provehunt nos ad vitam'. Similiter: 'Iustitia, fortitudo, temperantia,
prudentia est magna gloria viris'. (4) Potest etiam in
complexis terminis observari, (5) hoc modo: 'Ieiunium liberat
a peccato, mentem inluminat, vitam reparat et salutem'. (6) Hic
autem color dicitur coma.
15. (1) CONTINUATIO.
(2) Continuatio est cum absolutione sententiarum densa verborum