XX. De hirundine aues monente.
Vt linum pariat de lini semine, semen
Nutrit humus, sed aues tangit hirundo metu:
«Hic ager, hoc semen nobis mala uincla minatur;
Vellite pro nostris semina sparsa malis».
Turba fugit sanos monitus uanosque timores
Arguit; exit humo semen et herba uiret.
Rursus hirundo monet instare pericula; rident
Rursus aues. Hominem placat hirundo sibi
Cumque uiris habitans cantu blanditur amico:
Nam preuisa minus ledere tela solent.
Iam metitur linum, iam fiunt retia, iam uir
Fallit aues, iam se conscia culpat auis.
Vtile consilium qui spernit, inutile sumit;
Qui nimis est tutus, retia iure subit.
|
|