consecrari rogate, in quo reliquiae antiquorum sanctorum recondantur
cum sacratissimo corpore domini nostri Iesu Christi, et sic demum divina
misteria celebrentur. Tractate eum ut sanctum, sanctus sanctorum reddat
vobis mercedem sancti, sicut ipse dixit: « Qui recipit prophetam in nomine
prophetae, mercedem prophetae accipiet ». Ipse inspector est renum
et cordium et ipse illi dignam recompensationem remuneret et vobis
pro tanto desiderio gratiam suam indulgeat.
Alia epistola Leonis papae de veneratione s. Symeonis.
Leo episcopus servus servorum Dei W[iberto] Mutinensi episcopo salutem
et apostolicam benedictionem. Mirabilis Deus in sanctis suis,
gloriosus et mitis, magnae misericordiae et super malitiam praestabilis,
multorum fidelium ut vera comperimus relatione, centupla remuneratione
donavit sancti sui confessoris meritum et laborem Symeonis. Reverentissimo
abbati sancto Benedicto exhibeatur honor, adiuncto sibi socio Symeone
monacho, heremita et diacono. Mantuanus episcopus novam ibi consecrabit
ecclesiam, cui volumus ut exhibeas honorificentiam, scilicet interesse
te volumus huic consecrationi et huius corporis elevationi, et altare in eius
honore consecretur, quem Deus summa virtutum clarificavit dignitate.
Item alia episola.
A[lexander] episcopus servus servorum Dei H[eliseo] Mantuano pontifici
salutem et apostolicam benedictionem. Visis litteris quas antecessor
noster beatae memoriae papa Leo conscribi fecerat de corpore Symeonis
monachi et heremitae, eius sanctitate confisi, quicquid ipse laudavit et
nos laudamus. Ad hoc autem perficiendum Ferrariensem seu Veronensem
episcopos associamus.
|
|