CAP. III.
QUI VIRTUTES et vicia
Et virtutum officia
Recte novit discernere,
Non est ex bruto genere.
Virtus est mentis dignitas
Et animi nobilitas,
Quę homines mirificat
Insuper et deificat.
Obprobrium est vitium
Gerens mortis initium;
Illud qui secum baiulat,
Vivens mortuus ambulat.
Vicia concupiscere,
Hoc est venenum bibere.
Qui vult cum morte ludere,
Nequit vicia fugere.
Fugienda sunt vicia
Veluti precipitia,
Quę deludendo miseros
Heu! - mergunt ad inferos.
De virtutum gymnasio
Non demat nos occasio,
Nam virtutes diligere
Est angelicę vivere.
Scalarum gradus optimus
Paratur ex virtutibus,
Per quem itur ad dominum,
Qui est creator omnium.