Pag 28

39. FORMA INTERPOSITIONIS REI DILECTE PRO HOMINE EXOSO
Dum commendationis celebritas, dum fecunde laudibus fame preconium
iustitie nititur fundamento, iustitie utique omnium domine ac
regine virtutum, sine qua non accipiente personas privatione laudis
omnis actio, omnis defensio, omne rerum accidens angustatur, intrepida
spero fiducia apud vos, qui semper iustitiam coluistis, honesti effectum
propositi adipisci. Sane et cetera.
40. FORMA INTERPOSITIONIS HOMINIS DILECTI PRO RE EXOSA
Prudentum, nec vestra maxime, qui prudentie perspicacitate precellitis,
recipere non debet opinio, nec animo vestro posse debet impingere
inimici mendosa procacitas relatoris, quod S. , qui virtutem
semper excoluit, qui omni in vita enormitates abhorruit vitiorum, causa
que audaciam in fraudem rapere soleat, virum quippe castissimum
potuerit impellere ad peccandum. Sane et cetera.