Baldatium Anglariensem cum equitibus ducentis peditibus quingentis
in Romanae ecclesiae stipendia conscriptum, in Bononienses
ducere curavit. Qui peditatus centurionumque ductor impiger in
montes Mutinensibus continentes delatus, Casium Bargiumque et
subiectos ea in Rheni valle pagos cum recepisset praesidioque firmasset,
ad partem agri adversam ducens, Fornacianum Sassumque
et pleraque cepit pagos et castella; ex quibus utrisque regionibus
Bononiam haudquaquam contemnendis motibus agitavit.
XX. At in Lombardia belli duces interea quisque suos exercitus
reparaverant. Nam cum Sfortiani Troilus ac Nicolaus Pisanus
ex Piceno Etruriaque, ubi hiberna habuerant, exacto vere Ariminum
concessissent, cohortem ipsam Veneti navibus impositam et
in Meduaci amnis ostia ductam exposuerant in Patavinis, eaque
item forma paulo post Michelettum cum bina cohorte Paduam
transportarant; ubi, cum pridie Kalendas Iunias rei publicae copiarum
praefectus solemni pompa declaratus insignia accepisset, illico
Veronam ad Sfortiam properavit. Et traiecerat eo in tempore Padum
Piccininus, coactisque apud Soncinum quas reparaverat copiis, in
quis decem equitum peditatus mercennarii quatuor millia erant,
ad Idus Iunias Gambaram eo accessit consilio, ut Sfortiam paratissimum
ducentem exercitum ibi expectaret.
XXI. Is etenim qui, Micheletto auctus et Troilo ac Pisano,
quibus ante acta aestate caruerat, ad quindecim equitum peditatus
vero mercennarii sex millia haberet, immensam armamentorum
bellicarumque machinarum vim trahebat; tantis tamen cum impedimentis,
cum pridie easdem Idus Verona movisset, decimis castris
Castanedulum concessit. Sed cum Piccininus interea ad Minervium
recessisset, Bagnolum ipse ducturus, machinas armamentaque
curavit Brixiam comportari, ut cum signa conferre, nisi detrectasset
hostis, constituisset, expeditior decertaret: postera die Brixianorum
auxiliis auctus, mille passus ad Mellam fluvium est progressus.
Piccinino autem, licet Brixianorum factionis Ghibellinae auxiliis
auctus esset, nullatenus pugnandi copiam faciente, Sfortia, fluvio
ad Curticellas transmisso, per Gutianenses Cignanum advolavit,
quo in vico Piccininum noverat pridie consedisse.
XXII. Piccininus vero, hostem ratus e vestigio insecuturum,
campestris soli vicum qua hora advenerat parva opera hac ratione
reddiderat munitissimum. Rivos etenim irrigandis satis pratisque
|
|