In hac Mesopotamia Syrie. est Rages. civitas Medorum. in qua habitabat
Gabelus. cognatus Thobie. ad quem Thobias misit filium suum
Thobiam parvum ad recipiendum X talenta argenti. que sibi dare tenebatur.
et archangelus Raphael fuit ductor ejus eundo et redeundo. ut legitur in
libro Thobie.
In hac Mesopotamia Syrie. edificaverunt patres nostri videlicet
Nachor. Thare. et Habraham. ut legitur Genesi. Xjº capitulo. Deinde
postea venerunt et habitaverunt in terra Chanaan ex precepto Dei. ut legitur
Genesis Xijº capitulo. qui dixit Abrahe: Egredere de terra tua et de cognacione
tua et de domo patris tui et vade ad terram. quam monstravero tibi: et ista
terra fuit Ebron et Bersabee. que erant in terra Chanaan.
Secunda Syria est Celes. qui incipit a fluvio Eufrate et derivatur in rivo
Valanie. qui fluit sub castro Margad. fortissimo et inexpugnabili (est
fratrum hospitalis Sancti Johannis Jerosolimitami. nunc autem Soldani).
et cadit in Mare Magnum in villa Valanie. per tria miliaria a predicto
castro distante. In hac Syria Celes. est civitas Anthiochia cum urbibus
suis. ut est Laudicia. Apamia et aliis multis.
Tercia Syria est Fenicis. que incipit a predicto fluvio Valanie ab aquilone
et extenditur versus austrum usque ad Petram incisam sive destrictam
sub monte Carmelo. que alio nomine dicitur Castrum peregrinorum.
fortissimum. sed a Saracenis est dejectum. et fuit fratrum hospitalis Sancti
Johannis.
In ista Syria Fenicis. sunt civitates multe. videlicet Margad. Antaradum.
que nunc Tortosa dicitur. Tripolis. Baruch. Sydon. Tyrus.
Acon sive Acry et Capharnaum: et vocatur Syria Fenicis. a Fenice. filio
Agenoris. fratre Cadmi. qui Tyrum instauravit et metropolim hujus terre
constituit et terram suo nomine appellavit.
Quarta Syria est Damasci. quia Damascus civitas est metropolis. et hec
cum Syria Fenicis conjungitur. quia est contigua sibi. pervenit usque
ad mare Galilee et usque ad montes Seyr ed ad terram Roob et Soba: unde