De recuperatione castri Raçoli.
Et eodem anno, in mense Decembris nono die, recuperatum
fuit castrum Raçoli, quod tenebant Cremonenses, et ipsum habuerant
a dominis de Sesso, qui id tenebant per guerram, et redemptum
fuit a Cremonensibus pro pretio trium milium librarum
rexanorum absque aliis expensis in ambaxatoribus, militibus et
peditibus, qui iverunt in servitium Cremonensium.
Quod Parmenses obsederunt Burgum Sancti Donini et fecerunt pacem cum
concivibus suis, qui erant in Burgo.
Anno Domini MCCLXVIII, indictione XI, Parmenses obsederunt
Burgum Sancti Donini et habuerunt in adiutorium suum
Mutinenses, Cremonenses, Placentinos et Reginos. Et recesserunt
post longam obsidionem, destructis arboribus et blado et domibus
que extra erant, cum vineis. Item eodem millesimo Parmenses
fecerunt pacem cum concivibus suis qui erant in Burgo
Sancti Donini.
Et papa Clemens quartus ultimum diem clausit.
Item eodem millesimo infirmatus est papa Clemens quartus
in festo sancte Cecilie, et octo diebus post, scilicet in vigilia sancti
Andree, ultimum diem clausit. Et eodem anno Conradinus
transivit ad Rochettam et iuxta Brixiam et ivit ad Rochettam
domini Bosii et transivit flumen Adde et transivit per Tisinum ad
Papiam, et ibi stetit per multos dies. Et ivit Pisas per terram
marchionis de Careto et per mare; et milicia sua ivit Pisas, per
terras postmodum illorum de Flesco. Et eodem anno ivit apud
Romam per terras et contratas illorum de Tuscia contra voluntatem
Guelforum de Tuscia, et fecit exercitum super terram
Luche.
|
|