Pag 91

multitudini non valens resistere, aliquibus Cremensibus ab ipso
vulneratis, tandem ab eis captus et in terram proiectus multis
ei plagis impositis interfectus est. Aliosque etiam tres ipsius
ducis milites cum rampinis ferreis de ponte in terram trahentes
ipsi Cremenses vivos retinuerunt. Pars vero Cremensium
cum manganis lapides non modicos supra pontem iactando sic
eum in quadam parte fregerunt, quod alii Teutonici, qui post
ducem currere debuerant, ipsum postea sequi ausi non fuerunt.
Sed Cremenses, ut pontem ruptum presenserunt nec alios
Teutonicos viderunt sequi ducem, qui cum paucis precesserat,
super ipsum ducem eiusque milites fortiter irruentes, sic eos
cum lapidibus et ensibus atque lanceis ac maxime cum contonibus
urserunt, quod ipse dux aliquantulum sauciatus cum
parte suorum equitum in castellum rediit; pars vero per pontem
usque ad castellum redire non valens de ipso ponte extra castri
murum in fossatum se proiecit. Ceteri quoque, qui per pontem
iverant Marchesii, Cremensibus eis robuste resistentibus nihil
proficientes intra machinam, de qua exiverant, se receperunt.
Licet autem imperator eiusque principes, quod statuerunt,
plenarie non perpetraverint, assidue tamen die noctuque
Cremenses cum lapidibus et balistis ac arcubus oppugnaverunt;