De Sunam itaque transiens per campum magnum Exdrelon. transivi
iterum sub monte Tabor et perveni versus orientem usque ad unum
castrum projectum. modicum longe a Jordano forte per quinque miliaria:
deinde. transiens. perveni in Aylon sive Macheronta. castrum pulcherrimum. altissimum et inexpugnabile. super cacumen unius montis: sed in
pede montis est una pulchra villa. in qua fuit decollatus beatus Johannes
Baptista. sed a discipulis corpus ejus in Samariam portatum [est. et] inter
Heliseum et Abdiam prophetas sepultum.
Deinde. revertens super flumen et ripam Jordanis. perveni ad mare Galilee
sive Tiberiadis. sive Zenorech. sive Genezareth. et primo perveni
ad locum. unde exit Jordanis de mari Galilee. in quadam pulcherrima
valle sub monte Seyr: et ibi est unum casale. quod dicitur Geraza. quod
antiquitus fuit civitas Gerasenorum. et ab illa civitate dicitur mare Genezareth.
licet quidam dicunt mare Genesareth quasi generans auram. et est
contra Tiberiadis ab alia parte littoris maris. et eciam ultra Gerasia est casale.
quod dicitur Sueca. unde fuit Baldatz Suites. et aliud casale quod
dicitur Thema. unde fuit Eliphan Themanites. et quedam alia terra. que
dicitur Gadera. Pella. et plures alie.
Et est sciendum. quod mare Galilee sive Tiberiadis clarissimam et dulcissimam aquam habet: appellatur autem. secundum Scripturam. mare.
quia omnis lacus et congregacio aquarum dicitur mare. unde libro Genesi.
primo capitulo: Congregaciones aquarum appellavit maria: et istud mare
totaliter circuivi circumcirca et consideravi ipsum: continet enim circumcirca
forte XL miliaria. nam est longum per XVj miliaria. latum per X.
et Jordanis fluvius ingreditur et egreditur. Ab uno latere est mons Seyr
et mons Galaad et mons Hermon. qui sunt altissimi montes: tamen
habent pulcram planiciem in eorum cacumine. et per illos montes via
regalis. que venit de Palestina et de Egypto versus Damascum: quam
viam ego feci. et sunt ibi multe ville seu cassalia et infiniti cameli et pecora.
boves et animalia.