G. egregio et nobilissimo viro W. societatis et dilectionis
vinculum.
Bonorum frequens astipulatio de tuis sanctis moribus
in hoc me desiderium provocavit, ut amicitias tuas ardenter
exoptem, nam qui bonorum plurium ore celebrantur et
probitatis sunt fama laudabiles, merito a bonis omnibus sunt
amabiles. Preconia etenim, que de te a pluribus efferuntur,
veraci, ut expertus sum, ore promuntur. Es quippe natura
preclarus, sollerti pectore gnarus, factis conspicuus, moribus
egregius, largitate perfusus, in amicorum dapsilis usus.
Idcirco, amabilissime domne, tuam, ut dixi, amicitiam incomparabiliter
expetens, has tibi litteras scripsi, orans et
summa prece deposcens, ut, quid tibi super his placeat,
quam cito rescribas.
|
|