de processione remaneat. Redeuntes de processione nullus
praesumat se calciare sine licentia. Expleta missa et facta oratione ad
Uesperas lauent pedes et manus et canant Uesperas.
<DE FESTIUITATIBUS
TEMPORE QUADRAGESIMAE OCCURRENTIBUS>
Si festiuitatem celebrari in Quadragesima contigerit, praecedente die
dum canitur Agnus Dei ad maiorem missam colligatur cortina et auferantur
de choro formae, quae auferri solent in duodecim lectionibus. Missa
finita agatur oratio Uespertina sicut sabbato. Post collectam de festiuitate
dicatur antiphona de feria cum Gloria patri . Psalmi prostrati minime
dicantur. Post Uesperas de Omnibus Sanctis canantur Uesperae mortuorum;
Uigilia mortuorum minime agatur. In die festiuitatis post
Matutina de Omnibus Sanctis dicantur Matutina mortuorum. Postea
reuertantur ad lectos. Post Primam dictis consuetis psalmis familiaribus
cum capitulis et collectis suis dicantur septem psalmi cum letania. Per
singulas horas usque ad Uesperas a Prima incipientes dicant psalmum
Inclina Domine pro his quos prostrati dicturi erant. Post capitulum sedeant
in claustro cum silentio usque dum pulsetur signum ad Terciam. Infantes
quoque post capitulum suum descendentes de dormitorio hoc interuallo
in scola sua sedeant et legant. Totam diem solenniter agant; utraeque
missae ad maius altare celebrentur. Ad missam ieiunii nec letania praemittatur
nec ad canonem supra formas curuentur. Ad Uesperas, nisi in
crastino sit festiuitas duodecim lectionum, inter signa dicant Deus
auribus nostris , post collectam festiuitatis collectam de feria cum Gloria
patri , post Uesperas de Omnibus Sanctis Uesperas pro defunctis.
Uigilia mortuorum ipsa die minime agatur. Post Completorium cortina
extendatur et formae in chorum referantur. |
|