bona fide, et totum consilium concordavit; et sic amplificaverunt
locum suum et fecerunt viam novam per directum domus domini
Arduini de Taculis eundo recta linea ante ecclesiam Sancti Iacobi,
ubi habitant fratres Ordinis Petri Peccatoris de Sancta Maria
in Portu de Ravenna; cuius Ordinis est Sancta Felicula de Parma.
Quod Bononienses voluerunt occupare totum episcopatum Mutinensium et
habere sub dominio suo, sed Parmenses non permiserunt.
Et eodem anno, in mense Aprilis, Bononienses cum suis amicis
concordaverunt se et fecerunt consilium generale et consilium
populi et arengum et multa statuta, de volendo venire super
episcopatum Mutinensium in exercitum cum carrocio suo, occasione
accipiendi communi et civitati Mutine totum episcopatum
qui erat ultra aquam Scottenne versus Bononiam. Et de hoc
fecerunt Bononienses sculpiri unum lapidem sculptum de litteris,
sicut commune Bononie erat firmatum facere predictum exercitum.
Et predictus lapis erat muratus et positus in palatio communis
Bononie, ita quod potestas et capitaneus populi Bononie
videbant dictum lapidem cotidie, quando stabant in palatio. Et
Bononienses denuntiabant dicto potestati et capitaneo cotidie
ut facerent predictum exercitum, cum commune Bononie de hoc
firmatum esset, et dictus potestas et capitaneus iurassent predicta
facere. Insuper miserunt Bononienses Parmensibus ambaxatores
suos, qui in palatio communis Parme contionati sunt dicendo
et rogando, ex parte concivium suorum, quod placeret eis non
intromittere se de territorio Mutinensium a fluvio qui appellatur
Situla usque Bononiam, et ipsi non intromitterent se a predicto
flumine usque Parmam. Quod erat dicere: habeatis civitatem
Reginam cum episcopatu suo usque ad talem locum sub dominio
vestro, et nos habebimus Mutinam cum suo episcopatu usque
ad eumdem locum sub nostro dominio. Et responsum fuit eis a
Parmensibus quod non erat consuetudinis eorum absque culpa
destruere vicinos suos. Et remiserunt eos sine effectu, quia non
consenserunt eis super hoc negotio, sed servaverunt pacem et
|
|