nomina et tempora episcoporum et archiepiscoporum posuimus, qui in
civitate Ianue usque ad nostra tempora prefuerunt. et ut quilibet
quod voluerit facilius invenire possit, presentem cronicam in partes
.XII. et capitula plura duximus distinguendam. capitula
prime partis.
Prima pars continet a quo civitas Ianue fuit hedificata
et constructa, et ista pars habet .IIIIor. capitula. in primo
capitulo ostenditur qui fuerunt primi fundatores et hedificatores
civitatum. in secundo capitulo dicitur quod Ianus, primus
rex Ytalie, Ianuam construxit et hedificavit. in tertio capitulo
dicitur quod Ianus, civis Troie, ipsam iam hedificatam ampliavit
et melioravit. in .IIIIo. capitulo dicitur quod Ianus, qui erat
deus et simulacrum Romanorum, olim in Ianua colebatur.
capitula secunde partis.
Secunda pars continet tempus et antiquitatem constructionis
Ianue, et ista pars habet tria capitula. in primo capitulo ponitur
tempus in quo fuit constructa. in secundo ponitur tempus in
quo fuit ampliata. in tertio ponitur quod fuit a Carthaginensibus
sive Affricanis destructa, sed a Romanis rehedificata,
|
|