in Apuliam rediit, Conuersanes obsedit, eorum ciuitates et castella uiriliter expugnauit
et quosdam de eis captos in Siciliam misit. Transacto uero aliquanto spatio temporis cum
magno exercitu in Terram Laboris uenit, Nuceriam cepit et diruit, Auers[i]am destruxit, Capuam
et pene totam Terram Laboris occupauit. Princeps uero Capuanus simul cum comite
Raydulfo Neapolim se receptauit, sed quia ciuitas illa partim situ loci partim militia
munita erat, eam expugnare non potuit, sed militiam suam apud Auersam et in aliis uicinis
locis relinquens eam continuo inpugnari et deuastari fecit. Robbertus uero Capuanus princeps
Pisas ad implorandum Pisanorum auxilium iuit, relictis apud Neapolim Sergio magistro
militum et duce eiusdem ciuitatis et comite Raydulfo. Qui postmodum cum magno nauali
exercitu Pisanorum Neapolim uenit et maximam audaciam et fortitudinem baronibus qui Neapolim
erant prebuit. Galee uero Pisanorum super Amalfiam uenientes eam inmunitam et
huius rei insciam ceperunt et expoliauerunt. Quod audiens rex Roggerius qui tunc temporis
in Terra Laboris erat, misso exercitu suo Pisanos qui adhuc in Amalfie partibus morabantur
fugauit et multos eorum in ore gladii perdidit et sic ciuitatem liberauit. Pisani uero
deuicti et confusi primo Neapolim postea Pisas redierunt. Rex autem Roggerius uir discretus
et prouidus qui in agendis suis negotiis magis consilio quam uiribus utebatur, nun
in Terra Laboris nunc in Apulia inimicos suos uiriliter inpugnabat et quosdam eorum minis
et terroribus, quosdam uero beneficiis et promissis ad suam amicitiam attraebat. Robbertus
uero Capuanus princeps et comes Raydulfus et quidam alii de baronibus cognoscentes quod
regi Roggerio resistere non ualerent, ad Lotharii imperatoris Teutonici auxilium confugerunt
ipsum humiliter postulantes ut eis ammissas terras restitueret asserentes Apuliam et Siciliam
ad ius sui imperii pertinere. Rex autem Roggerius postquam inimicos et rebelles suos a
regno repulit et fugauit, totam terram in pace et tranquillitate possedit preter Neapolim quam
|
|