Sequente uero anno idem Otto Saxonum rex Romam uenit nobiliter cum exercitu et a
Iohanne papa coronatus est, accipiens ab eo totius Italie uexillum cum imperii dignitate,
professus iureiurando seruare fidem Romane ecclesie. Et tunc itaque Otto rex appellatus
est imperator.
Anno dominice incarnationis DCCCCLXVIIJ, hic in Apuliam uenit cum exercitu et oppidum
Barum expugnando cepit, cepitque ciuitatem Bibinum atque Asculum, Grecos expellens.
Interea apud Constantinopolim defuncto imperatore Niceforo, Iohannes cognomento
Simiski tenuit imperium annis VI . Quo defuncto Basilius et Constantinus filii eius ceperunt
imperare ab anno incarnatione domini DCCCCLXX, regnaueruntque annis LV. At uero
Rome defuncto Iohanne papa Benedictus papa sedit annis II, et post eum Leo sedit anno
uno mensibus II. Deinde uero Iohannes sedit annis VI mensibus XI. Hic a Petro prefeccto
Romane urbis comprehensus et in castello sancti Angeli retrusus, deinde in Campaniam
in exilium missus et post menses decem Romam reuersus est, et de persecutoribus eius ab
Ottone imperatore in urbe Roma supplicium sumptum est. Iste quoque papa Iohannes coronam
posuit imperii Ottoni imperatori, quique accepta corona Aquisgranum reuersus est.
|
|