Subtus illam scalam. est una capella parva. que habet unum hostium
usque plateam sepulchri: et in illa dicunt et cantant et officium
faciunt Nubiani calogeri. valde spirituales homines. qui sunt Ethiopes
nigri de gente presbyteri Johannis. qui est unus de majoribus principibus
mundi. Isti Nubiani tota die et tota nocte cantant. consecrant panem fermentatum. non elevant corpus Domini. dicunt ultraquam cencies alleluia
in una missa et semper portant crucem unam in manu. vocantur cristiani
Sancti Thome: magnam libertatem habent in terra soldani et Saracenorum.
qui. ut dixi. semper portant crucem in manu et coram soldano et
coram Saracenis et nullum persolvunt tributum per totam terram soldani.
et. quociens aperitur sepulchrum Cristi. intrant sine pecunia et tributo.
et hec est ratio. quia presbyter Johannes. dominus Nubie et Ethiopie.
habet potestatem in regno suo auferendi Nillum fluvium. que a Saracenis
dicitur Calizino. que transit per Kayrum et Babiloniam. inexpugnabiles
civitates soldani et postea dividitur et vadit Alexandriam in mari et Damiatham
in mari per terras Egipti et. quincunque reciperet illum fluvium.
illa terra esset omnino inhabitabilis. scilicet tota Egiptus. et similiter
presbyter Johannes est potencior soldano.
Isti Nubiani recipiunt tria baptismata. quia primo more Cristi circumciduntur.
quia dicunt. quod in puericia fuit circumcisus. secundo
baptismate ignis. quod cum ferro calido fit crux in fronte eorum et est
crux longa a loco. unde incipiunt capilli super fronte usque ad finem nasi.
nam totus nasus est signatus cum ferro calido. lata autem forte per iiijº
digitos. tercio baptismate aque. more cristianorum. Prope Nubianos. id est
prope capellam eorum. ymmo in capella predicta stabat virgo Maria. mater
nostra. ad prospiciendum filium suum super crucem. quia ille locus est
immediate sub monte Calvarie. forte a cruce per XX brachia: sed. propter
rupem. virgo Maria non poterat magis attingere et eciam forte propter
multitudinem astancium circa crucem. sed. ut vidi et tetigi. quia crux
erat in alto loco posita. nullus poterat appropinquare. nisi usque ad rupem.
exceptis carnificibus ipsum crucifigentibus: illam capellam sepe visitavi.