quando scribit duobus episcopis, ut Florentino et Fesulano. (7) Et notandum quod si fuerit legatus vel etiam delegatus ille cui scribitur non est hoc in salutatione tacendum, ut si dicam: 'H. episcopus, servus servorum Dei, I. Ravennati archiepiscopo apostolice sedis legato salutem et apostolicam benedictionem'. (8) Et vide quod si habet legationem perpetuam est coniuntio interponenda, ut dicatur 'archiepiscopo et apostolice sedis legato'. Quod si fungitur legatione ad tempus non debet coniunctio interponi.
(9) Generaliter vero omnes alios 'dilectos filios' appellat, nisi hereticos vel indignos. Unde abbati dicit taliter vel decano: 'H. episcopus, servus servorum Dei, dilecto filio P. abbati sancti Proculi de Bononia salutem et apostolicam benedictionem'. (10) Si duobus abbatibus simul scribat utrique locum sue dignitatis conservat, hoc modo: 'H. episcopus, servus servorum Dei, dilectis filiis I. sancti Stefani et P. sancti Proculi abbatibus salutem et apostolicam benedictionem'.
(11) Similiter facit omnibus in clericali ordine constitutis, excepto quod mediocribus clericis consuevit dicere, ut quidam asserunt, 'dilectis in Christo filiis' sed minoribus dicit 'dilectis filiis'. (12) Nunc videndum est quomodo papa secularibus personis scribat.