<SABBATO ANTE PASSIONEM DOMINI>
Sabbato ad Uesperas ante Passionem Domini dimittatur oratio de cruce.
Nec ad responsoria nec ad inuitatoria nec ad missas dicatur Gloria usque
ad Pasca, nisi missa familiaris sit in conuentu uel extra conuentum et nisi
festiuitatem alicuius sancti hoc tempore celebrari contingat; quae si
euenerit, et ad responsoria et ad missam dicatur Gloria patri sicut alio
tempore. Hoc tempore legatur Ieremias usque ad Pasca.
DOMINICA IN PALMIS
Ad inuitatorium duo in albis. Euangelium pronuncietur Cum appropinquasset ,
de quo et lectio et sermo in capitulo. In quo capitulo ordinet
abbas uel prior processionem et quid quisque portare debeat et qualiter
ordinate eant ac redeant fratres. Sacerdotes ad priuatas missas unam
tantum collectam dicant, euangelium Cum appropinquasset . Passionem
nullus legat nisi frater qui infirmis cantat. Missa matutinalis cum una
collecta. Post matutinalem missam benedicatur aqua, ad quam sint omnes
albis induti. Fiat processio per claustrum ut mos est omnibus dominicis
diebus. Intrantibus aecclesiam pulsentur signa et finito responsorio et
dictis quae dici solent dominicis diebus canatur Tercia. Cantata Tercia
legatur euangelium Turba multa . Postea accedens abbas aut sacerdos
benedicat palmas et flores et frondes ante maius altare supra tapetum
posita; aqua benedicta aspergat et incenset. Accedentes secretarii distribuant
ea: Palmas abbati et prioribus et personis honestioribus, flores et |
|