Pag 268

uero recepto a Romanis tributo et a cunctis habitantibus usque
ad mare occidentis, quorum regio uocatur Europa, reliquit eos
in pace. 23. Exinde amoto pelago Affricam properauit. In qua
paucos rebelles inueniens eam imperio suo subiugauit. Exiens
autem Affricam precepit militibus suis, ut ingrederentur cum
eo naues et irent ad Pharantide insulam ad deum Ammonem
consulendum. Factumque est. Cum autem irent ad templum
Ammonis, obuiauit ei ceruus in itinere, quem precepit a militibus
sagittari. Illi uero plures contra ceruum iacentes sagittas, ipsum
tangere nullatenus potuerunt. Vt autem hoc uidit Alexander,
apprehendit unam ex sagittis et ipsum ceruum continuo uulnerauit.
Ab illo namque die locus ille Sagittarius nuncupatur. Et ingressus
Alexander templum Salomonis fecit ibi uictimas et supplicauit
Alexander deo, ut ei responsum promitteret. 24. Deinde
amoto exercitu uenit in locum, qui dicitur Thapester. In quo
erant mille quindecim et habebant flumina duodena, que cursu
suo in mari labuntur, et erant ibi porte clause et cathenis ferreis
fabricate. Vnde Alexander immolauit diis. Eadem igitur nocte
apparuit Alexandro deus Serapis in sompno in habitu excelso
et forma horribili et timida; dixitque illi Alexander: "Potes
mutare hunc montem ipsumque super humeros transportare?"
Alexander respondit: "Et qualiter quis portare posset?" Serapis
dixit: "Sicut mons iste non mutabitur, sic nomen tuum et fatum
tuum memorabitur usque ad nouissima seculorum." Ad hoc
Alexander cepit ei supplicare dicens: "Rogo te, Serapis, (lac.)
"Bonum est et absque dolore ultimum supplicium ignorare. Attamen,
quia rogasti me, dico tibi: Per bibitam pocionem mortem
gustabis amaram. In iuuentute enim finies dies tuos. Noli tamen
horam et tempus inquirere, quia tibi nullatenus reuelabo.
Dicetur enim tibi a diis orientalibus fatum tuum." Exurgens
igitur a sompno tristatus est ualde et precepit, ut pars exercitus
peteret Ascalonam ibique prestolarentur eum. Ille uero sedens
precepit ciuitatem suo nomine fabricari. Cui nomen imposuit
Alexandria. 25. Interea audientes Egipcii aduentum Alexandri
exierunt ei obuiam et subiugati sunt illi, eumque in Egypto
honorifice receperunt. Intrans autem Alexander Egyptum, inuenit
statuam regalem nigro lapide sculptam, quam intuens Alexander
dixit: "Hec statua cuius est?" Egipcii responderunt: "Statua hec
Netanebi est, regis peritissimi Egipciorum." Audiens hoc Alexander
ait: "Netanebus pater meus fuit." Hoc dicens prostrauit se
in terram et cepit statuam osculari. 26. Deinde accepta milicia
Syriam est profectus. Syri autem uiriliter resistebant et
pugnauerunt cum eo. Et quosdam suos milites occiderunt. Exinde
ueniens Damascum eam uiriliter expugnauit. Deinde uero accepta
Sydone castrametatus est supra ciuitatem Tyrum, ubi cum
exercitu suo longo tempore commoratus multa incommoda perpessus
est. In tantum erat fortis ciuitas, tum murorum circumdacione