Saba Malaspina: Rerum Sicularum libri

Pag 308


declinavit in partem. Post octo namque dies ipsis
subtractis cibariis, panis et aqua tantum debebant,
secundum praedictam constitutionem Gregorii,
cardinalibus omnibus in reclusorio ministrari.
Cardinales gallici diversitatem ciborum
ac varietatem potuum latenter in abundantia
per ministros regios porrectorum gula stomachante
fastidiunt. Tunc sane dominus Johannes
Cajetanus sancti Nicolai in carcere tulliano diaconus
cardinalis, Argus, et argutus in ecclesia
Dei, omnisque ipsius cardinalis sequela, contra
regem Karolum non immerito causam et materiam
conceperunt odii et rancoris, pro eo, quod
erga constrictos reductosque infra murorum ambitum
compulsu inaequali et impari, superbe non
minus, regere se studebat. Demum ille, cujus dextera
beatum Petrum ambulantem in fluctibus ne
mergeretur erexit, non passus longae vacationis
ecclesiae suae sanctae stipendia, qui voluit esse
Dei mediator et hominis, discrepantes dominorum
cardinalium spiritus ad illius reduxit monochordium
unitatis, quod propere nimis, ultra
quam tunc credi posset, dominus Octobonus Sancti
Adriani diaconus cardinalis ad summi apostolatus
apicem, consulto prius rege a cardinalibus
gallicis praeter jus et consuetudinem, concorditer
evocatus, mutatoque proprio nomine, vocari
voluit Adrianus. Hic, pro eo, quod aestiva
tempora imminebant, quibus, nescio qua suspicione
de aëre corrupto concepta, romana ecclesia
vitare urbis romanae didicit incolatum, Viterbium
statim pergit, quasi praescitam festinantiam
ad mortem; ibique infra quadraginta dies
debitum naturae persolvit invitus. Post cujus obitum
domini cardinales reducti more solito in
palatio sub conclavi in cordis duritia et animi
obstinatione praeterita validiores effecti, sed diversitatem
corporum notis utriusque diversis diversitatem
induunt animorum. Nihilominus tamen
ex industria et sagacitate praedicti domini
Johannis Cajetani magister Petrus Hispanus
tusculanus episcopus ad apicem apostolicae dignitatis
assumitur, et Johannes XXI, mutato nomine
proprio, nominatur.
Cap. VII
Karolus rex, malis sui consiliariis suadentibus,
nova vectigalia imponit.
Sub istius tempore Karolus rex praefatus alias
impresso gravi pondere onus addens, et de perversorum
suorum consilio novos novorum gravaminum
modus invenit, et imposuit. Quidam enim
ex suis subdola suggestione susurrant, et aures
regias vento nitentes adulationis implere, dum
nil aliud cogitant, nisi cum alterius regi placere
jactura, dicunt in aures: "Domine mi rex,
forestas innumeras, camposque diversos et nemora
sub defensa, necnon alia infinita hodie regium
habet dominium, e quibus, quod est satis
mirabile, consideratis expensis, quas pro iis curia

Torna all'inizio