Quadragesimus autem in huius cenobii pręlatione regiminis
electus est domnus Oddo pręsbyter venerabilis; quem ipso die
post solis occasum, sepulto iam prędicto abbate B[erardo], cum
prior huius congregationis et aliqui maximę utilitatis fratres abessent,
quidam de confratribus sua quantumlibet conquirentes, quidam
vero intentione simplici et improvisa festinantes, elegerunt
sollemniter; Longobardum quidem genere sed nobiscum conversatum
ex plurimo tempore. erat denique astutus et cautus in
agendis negotiis, sive doctus prudentissime in litterarum studiis,
nimiumque promptus, omnibus sociis compatiens, abilis, affectuosus,
hilaris, gratulosus, vivax et decenter amabilis. verumtamen rerum
videbatur acquisitor cupidus, infatigabilis scriptor et assiduus,
laborator improbus, et honoris non modice avidus, nec inaniter
rerum largitor superfluus. hunc itaque sublimatum in electionis
pręlatione, qui aderant pręcipui fratres per sacramentum firmitatis
omni conventui fecerunt promittere ut secundum infrascriptam
promissionem provide in nostro pręesset regimine.
In nomine domini nostri Ihesu Christi. ego frater O[ddo,] quem vos
fratres electum ad huius monasterii regimen habetis, omnibus simul fratribus
et sociis filiisque fidelissimis huius gloriosę Pharphensis ęcclesię, et matris
Christi nostręque dominę beatissimę Marię omni nisu firmitatis, sub iureiurando
promitto me observaturum quod omnes inferius subscriptas res coram
Deo eiusque Genitrice confirmo huic venerabili loco sanctoque conventui
sicuti ab antiquis senioribus nostris audivimus anathema fecisse in capitulo
coram cunctis fratribus domnum Hugonem abbatem in pręsentia quorundam
episcoporum et venerabilium abbatum Odilonis et Guilelmi, ut nemo abbatum
huius cęnobii audeat vel consentiat aliquo modo auferre subscriptas res et
terras a iure et regimine huius conventus, neque alicui tribuere, nec per scripti
munimen nec per aliquam donationem, idest: tota Tornarię manualia, et quę
in Campo habentur vel in antea facere poterimus, campum de Granica, et manualia
de Phara, et cętera quę nunc sunt vel deinceps congrue addere comuni
cum consilio poterimus, manualia de Tribuco, molendina quę modo
habetis vel in antea facere poterimus, mortuorum oblationes quas Deus hic
pro animabus fidelium concesserit, exceptis tantum dextrariis et armis militaribus
vel quę modo regimini iuste competit ac modeste. per omnia vero
|
|