alius angelus secutus est dicens: Cecidit, cecidit Babilon civitas illa magna,
que a vino fornicationis sue potavit omnes gentes. Et tertius angelus secutus est
dicens: Si quis adoraverit bestiam et imaginem eius etc. Deinde loco septimo
sabbatum indicatur, cum dicitur: Et audivi vocem de celo dicentem michi: Scribe:
Beati mortui, qui in domino moriuntur. Deinde agitur de fine seculi, quando
consummabitur messis bonorum et vindemia malorum.
Quintus ordo ecclesie est generalis communem vitam ducentium; qui videlicet
ordo, quia partim in ecclesia partim in cenobiis agitur, templo simul et
tabernaculo designatur. Templum utique designat ecclesiam propter soliditatem
fidei, tabernaculum vitam cenobiticam eo, quod non habeant hic manentem
hereditatem, sed futuram inquirunt. Superius vero dictum est, quod in conspectu
throni sit quasi mare vitreum simile cristallo. Sedes dei ipsa est que et
templum, ipsa que et tabernaculum. Unde et hic de mari vitreo mentio facta est,
quod scilicet mare mixtum dicitur esse igne, quia mare eneum plenum aqua.
In eneo namque mari vita activa, que decet predicatores, designatur, in vitreo
vero vita speculativa, que propria est eorum, qui in claustris morantur. Qui ergo
vicerunt bestiam et imaginem eius et numerum nominis eius, super mare istud
consistunt, quia qui volunt esse perfecti, necesse est, ut contempnentes vitam
carnis bestiam vincant, et fugientes peccata criminalia imaginem superent, et
multitudinem vitiorum caventes numerum vincant. Numerus, inquit, hominis
est et numerus eius est sexcenti sexaginta sex. Certitudinem huius numeri
modo querere superstitiosum existimo, quia obscuritas in eo aliqua esse potest,
que sciri non poterit nisi in tempore illo, in quo bestia regnabit. Sufficit nobis
nunc scire, quod vitiorum turbam designet, quam illi qui possunt vincere, domini
efficiuntur laudatores. Egrediuntur de templo tabernaculi septem angeli
induti iaspide vel lapide mundo, quod est novo homine, qui secundum deum
creatus est, et precincti circa mamillas zonis aureis, id est non tantum castitatem
corporis habentes, que designatur in precinctione lumborum, verum
etiam mentis, que designatur in precinctione mamillarum et pectoris. Isti sunt
|
|