Eodem anno dominus Maghinardus Paganus de Sosenana fuit potestas Faventie pro ultimis
sex mensibus, videlicet a kallendis iulii usque ad kallendas ianuarii, et dominus Rigus de
Meçovillanis de Bononia fuit capitaneus eo tenpore.
Eodem anno dominus Opiçus marchio de Feraria factus fuit dominus in perpetuum civitatis
Mutine, et ivit ad ipsam civitatem, et eam tenuit in bono statu, et accepit uxorem filiam
domini Alberti de la scala de Verona, et eam duxit Mutinam, cum maximo gaudio et triunpho.
Eodem anno comune Arimini posuit castrum Savignani, ipsumque infortiavit in odium
domini Malateste, unde dominus Hermannus de Monaldensibus comes provincie Romaniole
fecit exercitum, ex omnibus gentibus dicte provincie congregatis, supra dictum castrum Savignani,
de mense augusti, et elevavit ipsum exercitum de eodem mense.
Eodem anno, de mense augusti, venit in provinciam Romaniole dominus Rixardus de
Alatro vicarius domini Stephani de Colunpna electi in comitem provincie Romaniole, et dominus
Hermannus de Monaldensibus recessit.
Item, in eodem mense, venit in ipsam provinciam dominus Petrus Saracinus episcopus vicentinus
legatus apostolioce sedis, et dominus frater Bartholomeus episcopus grossetanus, qui
fuerat similiter legatus, recessit. Et omnia castra, que comune Arimini tenebat, data sunt
in custodiam dicti legati pro ecclesia romana, et similiter omnia castra, que tenebat dominus
Malatesta.
Eodem anno, de mense septenbris, comes Coradus filius olim comitis Dadei de Montefeltro
accepit civitatem Urbini, et omnes amicos domini Malateste de ipsa terra eiecit, et
illos, qui erant de parte Ghibellinorum, reduxit in ipsam terram. Quare dominus Iohannes de
Colunpna marchio marchie Anconitane fecit eum requiri ut redderet sibi, et noluit, immo
eam infortiavit; et dictus marchio cepit comitem Dadeum fratem dicti Coradi: postea fecit
exercitum congregari supra Urbinum, et, die veneris XXIII dicti mensis septenbris, dedit prelium
maximum a tribus vel quatuor locis circum terram, et multi de ipsa terra, qui erant intus,
levaverunt insigna, ita quod habuerunt terram ipsam.
Eodem anno M.CC.LXXXIX, indictione secunda, die XII intrante dicenbri, supradictus
dominus Stephanus de Colunpna Romanorum proconsul, comes provincie Romaniole,
venit ad dictam provinciam, et intravit civitatem Arimini dicta die, ubi honorifice est receptus;
deinde venit ad civitatem Cesene, die mercurii XIV eiusdem mensis decenbris, ubi
cum honore maximo est receptus.
Die vero iovis sequenti idem dominus comes fecit equitem dominum Raulem de Maçolinis
de Cesena, in maiori ecclesia Cesene, cum honore maximo, et ibidem erant dominus Bonifacius
archiepiscopus Ravenne, dominus Petrus episcopus vicentinus legatus apostolice sedis,
dominus [Guido] episcopus ariminensis, et moltitudo gentium infinita, qui dominus legatus
missam cantavit in honorem beate Marie virginis. Demum, post prandium, dictus dominus
Raule equitavit ad potestariam civitatis Mantue, et predicti domini eum sociaverunt, cum
tota militia stipendiariorum, usque extra civitatem Cesene.
|
|