intellectu dicta sufficiant, ut de secundo, qui apertior est, largius
tractare possimus.
2. Abraam patriarcha ordinem designat episcoporum, qui a beato
Petro apostolo inchoatus est. Hic habuit quasi duas uxores, Saram,
videlicet, et Agar, quia non solum spiritalium virorum ecclesie
episcopalis ordo predicare tenetur, qui rarus est, verum et mundane
multitudini, que carnaliter vivit, vel ut de eis qui electi sunt convertantur
ad spiritalem ecclesiam, vel ut saltim temporalia
bona conferant his, qui spiritaliter vivunt et indigent corporalibus
bonis, donec spiritalibus imbuantur. Habuit ergo anchilla filium,
libera sterili permanente, quia a diebus Constantini augusti, multos,
ecclesia illa que seculariter vivit, cepit, per verbum Dei, habere
filios in fide Christi; sed spiritalis adhuc ecclesia sterilis ac tenuis
permanebat, quia pauci erant admodum, et si perfecti, qui spiritaliter
viverent. Quando autem omnipotens Deus voluit conceptum
dare libere, suscitavit in ea semen iusticie, puerum videlicet Benedictum,
qui datus est pontificali ordini ac si mitissimus Ysaac. Crevit
itaque puer iste, et Deus erat cum ipso. Non autem ipse Benedictus
solus nec ipsum solum misterium respicit, sed ordinem inchoatum
ab ipso; ipse vero in concordia manet. An non tibi videtur concors
quod Ysaac iuncta est Rebecca, quam et sororem cognominat, et
|
|