Et dominus Petrus comes Arthesius, frater regis Francie, ibat ut regi Karolo
daret succursum.
Item, eodem anno et tempore, anno secundo pontificatus Martini
pape, venit dominus Petrus, frater regis Francie, comes Arthesius,
cum maxima multitudine Gallicorum, et ibat in subsidium
Karuli regis Sicilie, patrui sui, contra Petrum regem Aragónie.
Et in festo sancti Hylarionis abbatis fecit in civitate Regina tres
milites, duos de Foliano, scilicet dominum Bertholinum et dominum
Symonem, et Rondanellam de Taculis. Et statim recessit
eadem die, quia festinabat ad succursum domini Karoli, sed
prius volebat videre papam Martinum.
De pace illorum de Struffis cum Ursis et Salustris.
Item, sequenti die Dominico, id est VIII° Kal. Novembris, facta est pax illorum de Strufis cum Ursis et Salustris in loco fratrum Minorum de Regio mediante fratre Iohannino de
Lupicinis, lectore fratrum Minorum de Regio. Et fuerunt ibi
multi homines et mulieres, iuvenes et virgines, senes cum
iunioribus.
De propheta Parmensium qui appellatur Asdenti.
Item his diebus erat in civitate Parmensi quidam pauper
homo operans de opere cerdonico (faciebat enim subtellares),
purus et simplex ac timens Deum et curialis, id est urbanitatem
habens, et illitteratus, sed illuminatum valde intellectum habebat,
in tantum ut intelligeret scripturas illorum qui de futuris
predixerunt, scilicet abbatis Ioachim, Merlini, Methodii et Sibille,
Ysaie, Ieremie, Osee, Danielis et Apocalipsis nec non et Michaelis
Scoti, qui fuit astrologus Friderici secundi imperatoris condam. Et
multa audivi ab eo que postea evenerunt, videlicet quod papa
Nicholaus tertius in mense Augusti mori debebat, et quod papa
|
|