Manfredus etc. iustitiario etc.
Ad regie prefecture fastigium providentia divina vocati, more consulti
patrisfamilias, cui debet inesse <cura> de subditis, inter sollicitudines
alias nostris sensibus inherentes, continua reddimur cordis pulsatione pervigiles,
qualiter regnum nostrum, quod preter turbationis preterite
tumultus innumeros, non sine multis persone nostre laboribus, in plurium
siquidem iniuriam populorum, omnimoda pacis tranquillitate nunc fruitur,
et ubertate rerum victualium naturaliter gloriatur, prudentum fulcimento
virorum, per quos tute rerum geruntur officia, nostris artificiose
temporibus ampliare possimus, ut fideles regnicole ad artium erudimenta
famelici, per aliena, ut assolent, studia mendicare suffragia non coacti,
paratam in regno mensam refectionis inveniant, et tamquam domesticis
fulta dogmatibus, eructantia ex hoc in illud eorum promptuaria plena
fluant. Ad hoc enim nos progenitoris nostri clara prioritas laudabilibus
invitat exemplis, qui virtuose mentis argumento compositus, sic statuit in
regni pomerio scientiarium virgulta concrescere, ut viros ibidem in qualibet
facultate peritos, non solum ut incolas filios gratia proprie suavitatis
imbueret, sed ad remotas et exteras nationes de cisternis suis aquas effunderet
labiis sitibundis. Sicque dum contigit in hiis cause munimenta deficere,
ceperunt causata diminui, et tot regnum ex cultorum inopia sentire
iacturas ut impudenter rogare cogatur ab aliis quod habundanter solebat
aliis erogare. Cupientes igitur super hoc paternis inherendo vestigiis,
tam predictorum gratam renovare memoriam, quam regnum ipsum gratis
novitatis nostre primordiis decorare, universale studium in civitate
|
|