in una tabula. de cujus ymagine die noctuque fluit oleum et liquor suavissimus
ad augmentum fidei catholice et ad ampliandum devocionem Virginis
gloriose. qui liquor seu oleum. ut dicitur. si in ampulis custoditur Vij
annis cum devocione. ad modum carnis convertitur. Ad hunc locum cum
devocione accessi et liquore[m] Virginis gloriose cum reverencia suscepi
et manibus meis illam ymaginem tetigi et liquorem egredientem de tabula
seu ymagine oculis meis ego vidi et ibi oravi.
Deinde. transiens de dicto monasterio. perveni ad unam pulcherrimam
aquam vel fluvium. qui ad modum sagitte labitur. super quem sunt
orti et jardini pulcri et ameni et multe pulchre ville et cassalia valde magna.
Et. inter cassalia. est unum cassale super ripam fluminis ad jactum
unius lapidis in quo est unum sepulcrum magnum et terribile. valde
antiquum. et habet Vj columpnas mire magnitudinis et pulchritudinis.
et supra montem altissimum. qui est supra illud cassale videntur Vj alie
columpne valde magne. Interrogavi per interpretem. turcimanum meum.
que sepulcra erant: dixerunt quod fuerunt filiorum. qui morabantur in
terra illa.
Deinde. procedens per illum fluvium per unam magnam dietam ad viam
que vadit de Damasco ad Baruch. ab utroque latere vie super colles
reperi maximam multitudinem vinearum. de quibus fit zebibum sive uva
passa. que portatur per totam Egyptum. et omnes circa regiones. Et. ulterius procedens. perveni ad unam pulcherrimam planiciem sub monte Libani.
que planicies clarissimis irrigatur fluminibus. et est lata per Xij miliaria.
longa autem plus quam per tres dietas. et extenditur illa planicies ab
una parte usque Tripolis et ab alio capite usque Sydonem sive Saietam.
et in hac planicie est infinita moltitudo camelorum. ovium. boum. bubalorum
et equorum et aliorum animalium. cum sint ibi pascua uberrima:
non enim vidi talia pascua in omnibus ultramarinis partibus sicut
in illa planicie. et multi Turchomanni habitant in illa planicie.
qui habent domos de pannis. et. de die in diem. cum suis
animalibus et familia mutant sua habitacula.