parte dicitur: Et reges septem sunt, decem vero cornua decem reges futuri
sub eodem tempore regnaturi.
Nota verbum et tempus. Angeli draconis persecutores martirum. Michael
Petrus, et Michael in Petro, sicut diabolus in Herode. Ipse enim primum fuit
caput draconis. Angeli Michaelis martyres sancti, de quibus dicitur: Ipsi vicerunt
eum propter sanguinem agni et non dilexerunt animas suas usque ad mortem.
Hoc prelium factum est post resurrectionem domini, consummatum est
autem Constantini diebus. Mulier vero fugit in solitudinem a facie serpentis,
ubi manet in tempus et tempora et dimidium temporis, quod nichil aliud quam
totum tempus ecclesie distinctum per septenarium designat. Fecit autem draco
prelium cum reliquis de semine mulieris, hoc est cum heremitis et monachis,
qui caste vivunt, sive cum fidelibus omnibus. Suscitavit namque de abysso
bestiam quandam habentem capita septem et cornua decem. Que nimirum
bestia, cum et ipsa septem tempora habeat, idcirco tamen in quarta parte revelatio
huius bestie scribitur, quia eius maxima fortitudo quarto tempore claruit.
Bestia ista est collectio infidelium, que more bestiali christianos persequitur.
Bestiam istam in quatuor Daniel distinguit; prima quasi leena, secunda
sicut ursus, tertia similis pardo, et habebat quatuor capita, quarta dissimilis erat
ceteris. Septem itaque capita Daniel in quatuor bestiis assignat, que Iohannes
assignavit in una. De leena vero et urso et pardo hoc modo facit mentionem
Iohannes: Et bestia, quam vidi, similis erat pardo et pedes eius sicut ursi et os
eius sicut os leonis. Pro quarta vero Danielis bestia accipit Iohannes cornua
decem. Tempus vero proprium huius bestie in ferocissima gente Sarracenorum
posuit, et idcirco in quarta libri parte, quia hec ipsa est quarta Danielis bestia,
et hec persecutio quarto tempore orta est, tempore scilicet heremitarum et virginum.
Quod vero caput ipsum dicit mortuum esse et iterum vite redditum,
manifestum est, quod prevalentibus Francis gentes barbare preliis contrite sunt
et quasi iam omnino prostrate, plurimis eorum in servitutem christianorum redactis,
et futurum est, ut bestia, que penitus interisse videbatur, in capite uno,
hoc est in uno regno consurgat, que talia factura est, qualia verbis explicari vix
|
|