Respondet Nicolaus de Rocca magistro Petro de Vinea.
Primis nudatus interulis occurrit oratorius scribentis affectibus, hiis
diebus, sub dubietate libellus, qui, nec personam expressim mittentis intitulans,
nec receptoris essentiam subfigurans, iudiciarii ritus ornamenta
redoluit, dum labores iudiciarios suasione molliri dictaminis exquisivit.
Errasse siquidem videbatur ille succinctus interpres in invium, dum, ad
me dyametrum dirigens, lactis indicia de petre soliditate mungebat. Sed
baiulantis nota conditio ad ipsius receptionem paulisper manum recipientis
provocavit erroneam, et concepte dubietatis articulum qualisqualis
fidei specie coloravit. Sane, si verum fateor, nec sit mihi missor incognitus:
unde dominus invitari debuerat, inde famulus redditur invitatus;
unde lenta precurrisse credebat epistola, inde preventa claudicans nomen
induit responsalis. Que devotionis enxenia sub gratiarum ammictu reportans,
ut sit forme relatrix in reditu, quam inter nos ad mutue collationis
applausus edere placet in posterum, specialis mittitur procuratrix.
|
|