pauperum, et custodiant se a deprędationibus eorum, quia Deus
advocatus est et defensor illorum. prędia vero quę a supra scripto
comite a nostro abstracta sunt monasterio hęc sunt: curtis Sancti Gethulii,
quam duces Spoletani Faroaldus eiusque successor, dato
concambio episcopatui Reatino cuius proprietas fuerat, nostro monasterio
contulerunt temporibus domini Thome. fundum Serranum
in integrum, quod Milo et Domnella diacona huic monasterio
concesserunt. fundum Canali. fundum Verruculę.
fundum Cutri.
Prędicti autem comitis Benedicti fuerunt filii Iohannes et Crescentius:
ex quibus Iohannes quodam anno in vigilia sanctę Marię
voti causa per suum missum mandans duodecim solidos fecit ponere
super altare ipsius, quos sacristanus assumpsit et inter alia
vota reposuit, nichil interrogans. alia autem die mandavit dicens:
« Dicite abbati, ut solidos duos faciat michi reddere, quia
non debui nisi decem pro pensione dare ». hoc ingenio fraudulento
ab hoc monasterio ablata sunt pręfata loca usque ad nostrum
ingressum. ipso denique anno interfectus est Crescentius
comes iussu Ottonis imperatoris et Gregorii papę, ut audistis, qui
nimis districte placita infra Romam exercebant. quorum territus
pavore pręfatus comes quęsivit nobis pactum, imperatore ac papa
scientibus, et refutavit medietatem curtis et ęcclesię Sancti Gethulii
com duobus casalibus, unde brevem testatam habemus;
et ego rogavi illi tertium genus de alia medietate cum castello Tribuco.
quo facto Romę, pręlibatus Crescentius venit illuc levitatis
causa. quem imperator et papa capientes, iusserunt patri eius,
ut redderet Cerem illis quibus abstulerat, quorum fuit. tunc in
pręsentia eorum promisit se facturum; et egressus de Roma, fugiit
illo. quo viso imperator ac papa nimis irati post eum properarunt,
et papa secum me ire pręcepit, dicens michi: « Veni mecum
ad Cere, eo pacto, ut si comes Benedictus reddiderit michi
ipsam civitatem, recipiat filium et stet finis inter vos; sin autem,
filium eius suspendi faciam ipso vidente, et tibi restituam Tribucum ».
|
|