karismate, sanctissimus pater et dominus noster summus pontifex, oleo
nostro nos ungens, in regem cuncta nobis insignia regia tradidit ac nos propriis
manibus regali dyademate coronavit, de quo, viri probate iamdudum
fidei, virtute conspicui, lete sollempnitatis tripudia celebrantes, mentes
vestras in vires fortioris fidelitatis erigite ac ceteris exempli materiam universis
et singulis in confusionem rebellium exhibete. Datum …
... rex Sicilie universitati Beneventane, per notarium Iohannem de Capua.
Attulit secum dilectionis et devotionis signa plenissima, quibus erga
personam nostram integritas vestre sinceritatis exuberat, vestrarum missarum
nuper nobis series litterarum, quas tanto gratiori benignitate recepimus,
quanto de maioris affectionis ubertate, que latere quin prodeat profecto
non potest, processisse noscuntur. De quarum litterarum placidissima
missione, universitati vestre gratiarum referimus uberes actiones, parati
semper ad omnia que vestri honoris et exaltationis continue civitatis
vestre ampla feliciaque respiciant incrementa. Ut autem de continentia
status nostri et de hiis, que in regni nostri partibus noviter emerserunt,
vestris affectibus satisfiat, ad notitiam vestram presentium tenore deferimus
quod, per Dei gratiam, plena corporis incolumitate vigemus, quodque
… de … et sequaces eius, publici hostes nostri, presumptione ducti
dampnabili, cum galeis versus partes Gaiete temerarie navigantes, ibi
moram – que ipsis, auctore Domino, perniciem afferet! – pertinaciter et
superbe trahere non verentur. Nos itaque ad subvertendum ydolum et cultores
eius accincti viriliter et potenter, congregato tam equitum quam
peditum exercitu copioso, in exterminium hostium eorundem, en, in Dei
nomine, properamus, sperantes firmiter quod per Dei gratiam, cuius negotium
agimus, dicti hostes, Dei et et ecclesie inimici, ultimate recipient
confusionis obprobrium, et extreme dispendium debellationis incurrent.
|
|