Surdior efficitur te cumulante preces;
Ad lacrimas flecti non novit rusticus umquam,
Tam pia sit, causa nulla movebit eum.
Non precibus sed verberibus, terrore minisque
Rusticus assiduis aggrediendus erit:
Tunc aures patulas, tunc cor miserantis habebit,
Tunc alacri faciet pectore velle tuum.
Qui si ditescat vel sublimetur honore,
Astra manu tangens, tunc sibi regna petit;
In turba turbo tunc est, in plebe susurro,
In dominum surgens arma minatur ei.
Nobilior Priamo, prudentior est Salomone,
Condere iura putat garrulitate sua;
Legibus obsistit, mores quoque dissipat omnes,
Ad causas omnes verba furentis habet.
Esse reus mortis deberet quisquis honoris
Villanum titulis intitulare studet;
Est populi clades quotiens ad culmen honoris
Rusticus ascendit, est quoque plaga Dei;
Ut lapidanda foret que montibus altior esset
Bestia, villanus qui dominatur ita;
|
|