<PARS PRIMA: DE OFFICIIS CIRCULI ANNI>
<DE ORDINE DIURNO MENSIS OCTOBRIS>
Kalendis Octobris remaneat meridiana quam facere solent monachi
in aestate. A dominica prima huius mensis cantetur et legatur de libris
Machabaeorum usque ad festiuitatem Omnium Sanctorum. Canantur
ymni dominicis diebus usque ad Aduentum Domini ad Nocturna Primo
dierum omnium , ad Laudes Aeterne rerum conditor . Priuatis diebus post
Matutina usque ad festiuitatem Omnium Sanctorum reuertantur ad
lectos suos, illucescente autem die pulsetur a custode aecclesiae paruulum
signum modice. Surgentes fratres in nocturnalibus suis et infantes et
iuuenes cum luminaribus suis ueniant in aecclesiam et facta oratione
cantent Primam et psalmos familiares cum collectis suis et septem
psalmos et letaniam. Inde exeuntes sedeant in claustro. Pueri uero
primitus alte legant et postea si opus fuerit cantent. Omni tempore
antequam legant infantes nullus in claustro legat aut cantet nisi in silentio
nec ad confessionem pergat. Antequam sonet signum ad apparatum
Terciae nullus calciet se diurnalibus suis exceptis iis, quibus extra
claustrum cura oboedientiae iniuncta est, et hi priusquam exeant aliquantulum
in claustro sedere debent et expectare ut prius infantes in scolis
suis legant. Cum appropinquauerit tempus horae Terciae, pulsetur
a secretario modice signum minimum quam skillam uocant et statim
pergant in dormitorium et calcient se diurnalibus et cultellos accipiant; |
|