Cap. C.
Cuidam nobili, ut procedat ad regimen civitatis,
cui praefecit eum in Potestatem.
De tua prudentia et fidelitate confisi, te
Potestatem civitatis Estuli, pro anno futuro
duximus statuendum, fidelitati tuae
mandantes: quatenus ad praedictam civitatem
te conferas, et Potestariam eandem ad honorem
et fidelitatem nostram, et pacificum statum
civitatis ipsius debeas fideliter exercere.
Jures nihilominus statuta civitatis ejusdem, et
consueto dari praedecessoribus tuis salario, sis
contentus. Damus enim consilio et Communi
civitatis ejusdem, nostris fidelibus, in mandatis,
ut tibi in omnibus, quae ad ipsius Potestariae
officium spectare noscuntur, pro eodem
anno intendere debeant, ad honorem et
fidelitatem nostram: tanquam nostro Potestati,
a Majestate nostra statuto, debitum et consuetum
tibi salarium praestituri.
Cap. CI.
Commanitati civitatis ejusdem, ut eidem Potestati
pareant et intendant.
Cum de prudentia et fidelitate T. de N. fidelis
nostri, confisi, ipsum Potestatem
vestrum pro anno futuro duximus statuendum:
fidelitati vestrae pracipiendo mandamus,
quatenus eidem T. fideli nostro, in
omnibus, quae ad ejusdem Potestariae officium
spectare noscuntur, pro eodem anno parere et