Brutianae parmae dicebantur scuta, quibus Brutiani sunt usi.
Bubinare est menstruo mulierum sanguine inquinare. Lucilius
(1186): «Haec», inquit, «te inbubinat, at contra te inbulbitat.»
Inbulbitare est puerili stercore inquinare, dictum ex
fimo, quod Graeci appellant bolbiton.
Bucerum pecus de bubus dicimus.
Bustum proprie dicitur locus, in quo mortuus est combustus
et sepultus, diciturque bustum, quasi bene ustum; ubi vero
combustus quis tantummodo, alibi vero est sepultus, is locus
ab urendo ustrina vocatur; sed modo busta sepulchra appellamus.
Buteo genus avis, qui ex eo se alit, quod accipitri eripuerit,
vastitatisque esse causam his locis, quae intraverit, ut bubo,
a quo etiam appellatur buteo.
Bucina quam nos appellamus, Graeci bukanen a similitudine
soni dicunt.
Bulimum Graeci magnam famem dicunt, adsueti magnis et
amplis rebus praeponere bou, a magnitudine scilicet bovis.
Hinc est, quod grandes pueros boupaidas appellant, et mariscam
ficum bousuckon.
Bub<l>eum est genus quoddam vini.
Bucephalus vocatus est equus Alexandri regis propter quandam
bubuli capitis similitudinem.
Benna lingua Gallica genus vehiculi appellatur, unde vocantur
conbennones in eadem benna sedentes.
Besem appellatum esse, quod bis triens sit, quamvis dura
|
|