alios e turribus proiciebant inermes. Hoc facto, protinus sese e turribus ostendentes,
signum scutis secretissime ut sibi imperator citissime occurreret faciebant. Domnus
interea hoc videns Thealdus, pavore suorum attactus virorum, ut imperator citissime sibi
et suis occurreret adortatus est. Itaque imperator indignatis Teutonicis, gens invida
Longobardis, omnibus ilico armatis militibus urbem paucis truncatis cepit; quin etiam
ipsum Gregorium insequentes, in locis tutissimis et turritis in veteri Roma semetipsum
colligentem obsiderunt. His ita gestis, imperator domni Thealdi 3. Kalendas Iulii
magnifice in auro et argento novis honoratis militibus, quorum audacia atque exercitiis
Roma capta imperatori subiacuit, ac ceteris primatibus diversis exaltatis muneribus, variis
fultis honoribus, cunctis gratiam dedit, solos secum Teutonicos retinens in palatio sedit
caesariano.
33. (IV, 3) Interea Gregorius sese videns a civibus et a quampluribus cardinalibus
destitutum, omnique spe auri et argenti amissa, e quibus sancti Petri regias et cancellos et
altaria decrostando nudaverat, qua secum Romanos tenuerat bellicantes, magis diligentes
aurum quam apostolum Paulum, nec non locum in quo fugerat ipse nimia ac diuturna
nocturnaque obsidione exire non posse, ad Robertum ducem Apuliae legatos, ut sibi
quamcitius posset gente coadunata immensa, et sancti Petri regalibus illi refutatis, subveniret,
cautissime et secretissime misit. Hic enim Apuliam et Caravriam multasque
civitates marinas, exiens Nurmandiam, cuius miles pauper cum suisque sociis fuerat,
noviter et iniuste cum suis multis criminibus invaserat. Igitur gente coadunata inmensa
et Saracenis omnibus quos habere potuit, in paucis diebus Romam veterem, Romanis
sese ac filios ac uxores minime tuentibus, Rufini et Albini reliquiis deficientibus armata
manu Robertus intravit. Quo ingresso, post aliquot dies imperatorem Urbem exiisse
invenit. Itaque gens diversa de Deo ignara, sceleribus ac homicidiis edocta, adulteriis
variisque fornicationibus assuefacta, omnibus criminibus, quae ferro et igne talibus agi
solet negotiis, sese furialiter immerserat; quin etiam virgines sacratas corrumpentes
miserorumque Romanorum uxores incestantes, ac anulos eius earum digitulis detruncabant.
Quid multa? tribus civitatis partibus multisque palatiis regum Romanorum adustis,
Gregorius demum filiis male crismatis filiabusque peius consecratis, cui iam spes ulla
vivendi in civitate non erat, ab Urbe exiliens cum Roberto Salernum profectus est. Ubi
per pauca vivens tempora, tamquam malorum poenam emeritus interiit.
34. (IV, 4.) Cum haec agebantur universa, et clericorum scisma laicorumque furialia
praelia principatum tenerent, quidam sacerdos Anselmus nomine, quem domnus Thealdus
in sacerdotio consecraverat, quadam die in sancti Mauritii vigiliis, dum omnium sanctorum
collectam, sanctae Mariae vespero finito, ante altare sanctae Mariae ad Funticulum
summa cum reverentia diceret, videntibus clericis tamquam mortuus, vultu tamen coloratus
pulsantibusque fibris, cadens occidit. Quo audito multi ex civitate utriusque sexus
exeuntes, visu videbant mirabile omnibusque terribile. Cumque multorum turmae turmatim
ad hoc convenissent inauditum, alii credebant fictitium, alii pedes subula vel acu
secure quasi mortuo pungebant. Factum est autem in altero die circa meridiem, videntibus
multis ac stupefactis, quasi ab angustiis liberatus, clamans poenitentiam, spiritu
restaurato sibi sese velocissime erexit: qui multa tormenta incredulis ac usurariis incredibilia,
et honores et gloriam quae super sanctos vidit viros, prout potuit, angelo sibi
haec omnia ostendente, qui spiritum eius per diversa portavit, lacrimis multis patefecit.
EXPLICIT LIBER HISTORIARUM LANDULFI HISTORIOGRAPHI.
|
|