De narratione nichil hic dicatur, quoniam in ea beniuolentia
non captatur, sed rem meram mere explanare
conatur.
Ceterum captationis modos in epistolis tres esse necessarios
nouimus. quarto frequenter non utimur. aut enim
ab eo qui mittit seu cui mittitur captatio capitur, uel ex
ipsa re, id est ex hoc quod illorum alter uel utrique diligunt
conmendando beniuolentiam captent.
X.
Sunt preter hoc duo necessaria, id est coma et cola,
sine quibus orator perfecta non utitur eloquentia.
Est coma diuisio, uidelicet subsequens precedenti non
multum inpar positio, quando scilicet distinctiones uidentur
quasi currere. et sint inter se fere conpares. uerbi
gratia: uestre dilectionis et fraternitatis littere meas ad aures
usque uenere: quarum presentiam uellem si possem pre oculis
semper habere . hoc in epistola est necessarium. sine
quo inconcinnum constat omne prosaicum.
Colam uero membrum esse dicimus, quando diuersa
uel aduersa responsiua uel simpliciter positiua accidentia
uni rei damus, quibus laudem uel uituperationem quadam
uerborum conculcatione expolite signamus.
Quarum quasdam sine interrogatione, quasdam
interrogatiue inuenietis, ut subsequenter in epistolis
patebit.
|
|