Saba Malaspina: Rerum Sicularum libri

Pag 335


edictum de armis non portandis in regno est
poenale. Conveniunt ad tanti festus tripudia quidam
servientes gallici, familiares forsitan justitiarii
regionis, non ad concelebrandum tanti festus
solatia, sed potius ad turbandum; qui nati
utinam non fuissent, aut non venissent in regnum!
Obviant extra terram agminibus virorum
et mulierum laudantium in choreis, inchoant
tripudiare cum ipsis, manus jungunt manibus,
et disceptant brachia per choreas, muliebres manus
Gallici contrectant, forsitan ultra quam
decet tripudiantium honestatem; convertunt oculos
ad formosas, et quas manu pedeque nequeunt
tangere, verborum significatione sollicitant,
et nutibus oculorum. Jam aspectis excessibus
hujusmodi, qui potius poterant dici, cum sola
hilaritas hos faceret animosos, quidam insolentes
panormitani juvenes cum quibusdam gayetanis
exulibus provocantur, menteque turbata,
versus Gallicos in quaedam verba contumeliosa
prorumpunt. Gallici non aeque animo perferunt
verba probosa, sed ajunt: "Non potest esse quod
isti mali patareni arma non deferant, ubi cum
tanta nobis audacia dant responsa; rimemur, si
est inter eos armatus aliquis, aut qui cultellum
percussorium penes se habeat, sive ensem".
Rimantur igitur; furor accensus est animorum;
cum armis, lapidibus irruit in Gallicos panormitana
juventus, factus ibi multorum concursus
contra Gallicos armatorum; tandem pars
major illorum servientium lapidibus obruta, et
lacerata gladiis corruit cruentatis: ludus enim
genuit trepidum certamen et iram, truces inimicitias,
et funebre bellum. Contra Gallicos ergo
extra terram commota est funesta seditio, intraque
terram cum exteris seditiosi clamores, populique
tumultus. Adunatur tumultuosa multitudo
dicentium: "Moriantur Gallici, moriantur".
CAP. V
Gallicorum caedes.
Sicque in populo scelerato erecto capitaneo
quodam Rogerio de Magistro Angelo, crescit seditio
contra Gallos, crescitque pestifer popularis
tumultus. Distinguuntur seditiosi per agmina, et
Gallos per terram usquequaque perquirunt, et
inventos trucidant immaniter sine pietate. Non
parcunt sexui, vel aetati; sed matres cum infantibus
vagientibus lacerant, alios inter trepida
partus opprimunt viscera, et occidunt, aliosque
inter maternas ulnas caepta fuga diripiunt, et
eorum frustratim membra discerpunt. Quamplures
intempestive maternis apertis uteris, et visceribus
laniatis, educunt in dium, quos adhuc tanquam
maternarum viscerum portionem luce carentes
ortus privant et luce futura. Non solum
ad haec in mulieres gallicas taliter saevit panormitana
feritas, sed Gallorum conceptus, quas
alvus mulieris latinae inter viscerum claustrum
celabat, crudeli rimatur gladio, quo periit simul

Torna all'inizio