Fridericus II imperator: Epistolae

Pag 184


Imperator Fredericus … comiti Casertano.
Cum, sicut firma nuper relatione comperimus et te in parte non credimus
ignorare, L. illustris rex Francorum dilectus amicus noster ad partes
ultramarinas, prout iam dudum stabili mente disposuit, transfretare
magnifice sit paratus, quem per partes Sicilie transire velle constanter
audivimus vel ibidem, si casus inciderit, yemare, nolentes ut insula ipsa
nostri pars utique preclara dominii, tempestate presentium negotiorum
et temporis imminente, rectoris seu presidis presentia careat qui personalis
nostre maiestatis essentiam representans et regem ipsum loco nostri
quo decuerit honore recipiat et provinciam ipsam in omni tranquillitate
gubernet, quamquam regnum nostrum in proximo, civitatis Parme
depressa protervia vel ipsius urgentissime depopulatione peracta, repetere
personaliter disponamus, te ad partes illas tamquam precipuum loco nostri
vicarium ante faciem nostram salubri consideratione providimus premittendum;
devotioni tue mandantes quatenus incontinenti receptis presentibus,
ad comitivam tuam viris aliquibus fidelibus nostris de Terra Laboris
et comitatu Molisii tribus vel quatuor deputatis, magnis et continuatis
dietis ad partes ipsas, sicut unquam gratiam nostram diligis, celeriter
studeas te transferre. Qualiter autem super receptione regis eiusdem et
negotiis nostris illarum partium gerere te velimus, per latores presentium,
nuntios tuos fideles nostros, quibus super hoc plenissime beneplacitum
nostre maiestatis expressimus et fidem plenariam adhibere te volumus,
sufficienter poteris informari.

Torna all'inizio