Eodem anno, die XVI intrante iunio, venerunt litere domini pape, bullate cum bulla
plunbea, ad dictum dominum comitem Romaniole, qualiter dominus papa faciebat eum vicarium
in spiritualibus in provincia memorata; et sic utrunque gladium habuit, spiritualem et
temporalem.
Eodem anno M.CC.LXXXXI, indictione IV, cum dictus dominus comes vellet eligere
et dare potestatem et rectorem comuni civitatis Cesene ad voluntatem suam, et predictum
comune nollet, idem dominus comes separavit se, cum tota sua curia, de ipsa civitate Cesene,
die lune II mensis iullii, et venit Forlivium, et dictam civitatem supposuit interdicto.
Predictum vero comune Cesene, tam a mandato sibi sub pena X.m marcharum argenti, quam
etiam ab interdicto, per suum sindicum, ad sedem apostolicam appellavit. Demum venerunt
anbaxiatores cum sindico ad mandata domini comitis, et misit rectorem et potestatem ad
civitatem Cesene, die VI mensis iullii. Et fuit potestas Cesene, pro sex mensibus, dominus
Dego de Cancelleriis de Pistorio; et Malatistinus, qui fuerat potestas, recessit et separavit se
de dicta potestaria.
Item, die dominico VIII mensis iullii predicti, idem dominus comes Romaniole ivit Imolam
causa faciendi concordiam inter Alidoxium et suos sequaces, qui erant extra Imolam, ex
una parte, et Nordiglos et eorum sequaces, qui erant in ipsa civitate. Demum separavit se
de civitate, pro eo quia non potuit facere ipsam concordiam, et venit Forlivium.
Suprascripto vero anno millesimo ducentesimo nonagesimo primo, indictione quarta, supervenerunt
nova, in partibus Italie et per universum orbem, qualiter civitas Acri, quam tenebant
Christiani, et qui morabantur in eam, tam fratres milicie Tenpli, quam Hospitalarii et alie mansiones,
ac etiam alii, tam terrigene quam forenses, ad defensionem fidei christiane et pro recuperatione
sepulcri Domini nostri Ihesu Christi et Terre Sancte, que a Saracenis et Infidelibus
detinetur; contigit quod soldanus Babilonie, cum innumerabili multitudine Saracenorum,
venit ad obsidionem civitatis ipsius Acri, et, per plures septimanas, ibidem moram traxit,
construendo edificia et manganos, qui iactabant ad exterminium et diruptionem murorum
civitatis eiusdem, replendo similiter foveas et frangendo muros ipsius, ita et taliter, quod, die
XVIII mensis maii eiusdem anni, predicti Saraceni, per vim, armata manu, intraverunt civitatem
eandem, preliantes fortiter cum Christianis, qui steterunt ad defensionem ipsius. Multi enim
ex Christianis aufugerunt ad naves, et, per mare, separaverunt se deinde. Et, in dicto conflictu
et debellatione, mortuus fuit magister generalis milicie Tenpli de uno quadrello, et infiniti alii
mortui sunt, pro nomine Ihesu Christi et pro defensione et recuperatione Terre Sancte, quorum
anime in pace perpetua requiescunt.
Eodem anno, die XII mensis augusti, in civitate Forlivii, in palatio populi, facta fuit
concordia et pax inter Alidoxium et Litum eius fratrem, ex una parte, et sindicum comunis
et hominum intrinsecorum civitatis Imole ex altera.
Item, die VIII mensis septenbris, dominus Ildebrandus comes predictus equitavit ad civitatem
Imole, causa reducendi dictos extrinsecos in dictam civitatem, et, die XXI dicti mensis
septenbris, dominus Alidoxius intravit civitatem Imole cum magno gaudio et triunpho: non
tamen fuit bene receptus ab intrinsecis dicte civitatis.
|
|