omnibus hominibus, ut in cunctis glorificetur Deus atque laudetur
operibus. non enim parvipendit si quando ab insciis
blasphemetur Deus vel si inter pios aliqua causa sit ut scandalum
possit oriri, Scriptura quippe dicente: « Oportet nos testimonium
bonum habere etiam ab his qui foris sunt ». hęc
iccirco fatemur quoniam quosdam simpliciter, quosdam vero invidiose
novimus musitarę de domni patris nostri Beraldi pręlatione.
aiunt enim, illum ceu tyrannium et bonorum distractorem
fuisse cenobii huius, ideoque in eo aliquomodo scandalizantur.
quorum scrupulum ut vitare quęamus, ipsius nonnulla gesta a
primevo tempore huic opusculo inserere curamus, quatinus proficua
plurima erga huius cenobii negotia ab eo perpetrata fideliter
proferamus. enimvero ipsius pręlationis diebus periculosa
tempora perspeximus, et quędam inaudita contraria adversus hoc
monasterium invidię causa a nostris vicinis capitaniis, comitibus
et maxime a pontifice Romano iniuste effici minime ignoramus.
quę ille omnipotentis Domini iuvamine eiusque suffragio Genitricis
immenso certaminis pondere pertransivit viriliter. Defuncto
denique domno Berardo secundo abbate, hęc ecclesia Farfensis
in maximam devenit defectionem. eramus enim sicut oves non
habentes pastorem, quoniam qui nostrum tunc assumpserat regimen,
a suis non modice contemnebatur, et ab extraneis pro
nichilo ducebatur. comites quoque sive capitanei pene omnes
bona abbatię pedetemtim sibi conabantur optinere. Quapropter
pręcipui seniores domnum Beraldum nobiliorem incliti viri Ascari
filium elegerunt abbatem, videlicet ut, suorum plurimorum sublimium
fultus iuvamine parentum, nequaquam cederet cuiquam res
huius monasterii subripere; quod ita factum Dei providentia perspeximus,
quemadmodum in posterum fideli relatione narrare
curabimus. postquam vero corroboratus est in abbatię honore,
illi qui ante bona huius cęnobii satagebant demoliri, aliquantulum
istius sunt terrore compressi, et qui prius crudeles videbantur
ęmuli, demum se simularunt fideles fore clientes. sed minime
diu latere valuit virus quod in eorum iecore latebat. Interea
|
|