Cap. XXXIV.
Conclusio super processum ad curiam destinando,
in causa appellationis, super terminali condemnatione,
facta negotii narratione.
Supplicavit Excellentiae nostrae Saulus de N.
fidelis noster. Nos autem ipsius supplicationibus
benignius inclinati, fidelitati
tuae mandamus, quatenus si praemissis veritas
suffragatur, et causa ipsa judiciario ordine cognita
extitit, et sententialiter terminata, processum
et formam condemnationis ejusdem
sub tui sigilli impressione nostrae Curiae studeas
destinare: eidem Potestati nihilominus
pro parte nostrae Celsitudinis praecepturus, ut
similiter totum processum condemnationis ejusdem
habitum coram eo ad nostram Curiam sub
suo sigillo destinare procuret: ut in ipsa causa
per judices magnae nostrae Curiae, de processu
praedicto edoctos, procedatur, sicut juri et honori
nostri culminis videbitur expedire: praecepto
per te facto eidem Potestati et Communi
de syndico ipsorum, ad nostram Curiam destinando:
praeterea et S. praedicto peremptorio
termino assignato, quo se nostrae Curiae repraesentent,
in causa eadem prout convenit processuros,
justitia mediante. Volumus insuper,
ut de die citationis et termino statuendo, tuis
literis debeas nostram Curiam edocere.
Cap. XXXV.
De salariis Potestatum, in approbata forma.
Pro parte universitatis Castri de N. fidelium
nostrorum, nuper Celsitudini nostrae fuit