Furcilles sive furcilla, quibus homines suspendebant.
Fundus dicitur ager, quod planus sit ad similitudinem
fundi vasorum. Fundus quoque dicitur populus esse rei,
quam alienat, hoc est auctor.
Futare arguere est, unde et confutare. Sed Cato hoc pro
saepius fuisse posuit.
Futtiles dicuntur, qui silere tacenda nequeunt, sed ea effundunt.
Sic et vasa futtilia a fundendo vocata.
Flagratores dicebantur genus hominum, quod mercede flagris
caedebantur.
Flustra dicuntur, cum in mari fluctus non moventur, quam
Graeci malakian vocant.
Flator tibicen.
Flemina dicuntur, cum ex labore viae sanguis detluit circa
talos.
Flaminius circus et via Flaminia a Flaminio consule dicta
Sunt, qui ab Hannibale interfectus est ad lacum Thrasimennum.
Flaminia aedes domus flaminis Dialis.
Flammeari, infectores flammei coloris. Violari violacii dicuntur.
Flumentana porta Romae appellata, quod Tiberis partem
ea fluxisse adfirmant.
Flammeo amicitur nubens ominis boni causa, quod eo assidue
utebatur flaminica, id est flaminis uxor, cui non licebat
facere divortium.
Fidusta a fide denominata, ea quae maximae fidei erant.
Fides genus citharae dicta, quod tantum inter se cordae
eius, quantum inter homines fides concordet; cuius deminutivum
fidicula est.
|
|