Ad maiorem missam post Sanctus psalmus primus Domine ne in furore tuo
ab unoquoque sub silentio dicatur, Kyrieleison. Pater noster. Saluum fac
seruum tuum. Mitte ei domine auxilium de sancto , collecta Omnipotens sempiterne
deus, salus aeterna . Et hoc tamdiu agatur quousque ad sanitatem redire
uideatur.
<DE MORIENTIBUS>
Porro si ad sanitatem minime redire mortique potius appropinquare
dignoscitur, ex quo certa in eo mortis signa apparere inceperint, sine
duobus fratribus esse non debet, qui diebus et noctibus quamdiu intellectum
tenet legant coram eo passiones domini et euangelia. Et cum
intellectu priuatus fuerit, quamdiu superuixerit psalterium ex ordine
decantare non cessent. Et sic ordinetur ut discedentibus duobus succedant
duo alii; horas uero regulares ibi dicant. Egro autem in agonia
posito et iam iam si ita uisum fuerit morituro, famulus qui ad hoc
deputatus est cilicium expandat et supra illud ad mensuram longitudinis
et latitudinis quam ipsum cilicium habet signum crucis de cineribus
faciat morientemque fratrem desuper ponat. Cui postea indesinenter
assidens studiose consideret qua hora exitum eius conuentui debeat
indicare.
Cumque eum iam in exeundo uiderit laborare, gestans manu tabulam
ad hostium claustri currat ictuque creberrimo acriter eam ibi percutiat,
quousque in conuentu auditum esse cognoscat. Quo percepto sonitu
si ad maiorem uel minorem missam uel ad regularem horam fuerint,
remanentibus in choro infantibus cum magistris suis et aliquibus fratribus
quibus iussum fuerit reliqui omnes ad egrum currant et mediocri uoce
canentes Credo in unum deum ad eum ueniant. Fratres uero qui remanserunt
expleto quod coeperant eodem modo currentes et canentes ad morientem
properent. Ubicunque uero alias uel quocunque alio negotio occupatos
praedictus sonus inuenerit, sine aliqua excusatione uel mora similiter
currentes et Credo in unum deum canentes ad egrum ueniant. Quo peruenientes
et Credo in unum deum communiter explentes canant septem
psalmos penitentiales sine Gloria . Quibus expletis subiungat sacerdos
capitulum Parce domine, parce famulo tuo, quem redimere dignatus es pretioso
sanguine tuo, ne in aeternum irascaris ei . Hoc tertio a sacerdote dicatur et per |
|