Pag 181

minus X annorum infans cum infinita multitudine pauperum venit de Teutonia
asserens sine nave transiturum mare et Ierusalem recuperaturum.
CONTINVATIO.
Anno MCCXIII. die sancto pentecostes, qui fuit eo anno in festo sanctorum
Marcellini et Petri, scilicet secundo die intrante Iunio, Cremonenses in auxilium
Papiensium, quorum multi in transitu regis de Papia ad Cremonam capti fuerant,
aput Castrum-Leonis cum carrocio convenerunt, non habentes in auxilio nisi
CCC milites Brixienses. Et ecce factus est repente sonitus Mediolanensium cum
suo carrocio velocius et fortius quam poterant adversus Cremonenses festinantium.
In quorum auxilio convenerant Placentini milites et sagittarii, Laudenses et
Cremenses milites et pedites, Novarienses et Cumani milites et de Brixiensibus
totidem aut plures. Circa horam terciam inceptum est prelium; pugnatur viriliter
et fortiter ab utraque parte usque in horam nonam. Circa nonam vero
horam Cremonenses impetum facientes in eos straverunt ex eis multitudinem
copiosam. Et captum carrocium eorum et multa milia pugnatorum induxerunt
in Castrum-Leonis.
[Anno MCCXV. obiit presul Sighardus mense Iunii, huius presentis
operis conpilator. Eodem anno mense Novembri dominus Innocencius papa
aput Lateranum celebravit concilium].
Anno MCCXVI. Cremonenses et Parmenses ingressi episcopatum Placentinorum
multas eorum villas conbusserunt; et in eorum reditu soli Cremonenses
ceperunt Pontenurum, et fugatis Placentinis usque ad Montale, cum multa preda
et multis captivis ad castrum redierunt. Secundo vero die cum Mediolanensibus
et Laudensibus et Cremensibus et Placentinis inter Fontanam et Caurcium
pugnaverunt; et licet magna pars Cremonensium et Parmensium iam reversa fuisset
domum, tamen postremi, qui remanserant, viriliter pugnantes eis omnino restiterunt
et inimicis spe frustratis cum gaudio et exaltatione domum remearunt.