XV
In dedicatione ecclesiae
1. Refulgent clara huius templi culmina
perfusa luce septiformis spiritus,
Christi rubescunt purpurata sanguine,
perlita rore pretiosi balsami
odore flagrant mixtis aromatibus.
2. Sint semper istam supra domum, domine,
tui aperti, deprecamur, oculi,
auresque tuae sint intente iugiter
diem per omnem noctis et in tempore,
tuoque semper ore benedicito.
3. Sint angelorum hic alta frequentia,
descendat omnis hic caelestis gratia,
diffusa sancto largiente spiritu,
uultu sereno sancta semper trinitas,
pio fauore dignetur inspicere.
|
|