Gaufridus: Summa de arte dictandi

896


debellare. Vel: Ira leonis in papiliones non fulminat, set reluctantes ursos
precipitat et prosternit.
Vel: Cum fulminis impetus uires suas expendere
dedignetur in uirgulam, iniquum est ut maiorum potentia deseuiat in minores.

Vel: In plebeculam uolucrum sue armis potentie accipiter non
deseuit.

12. EXORDIUM POTENTIUM CONTRA PAUPERES.
E contra sic poterit responderi: Nichil interest an uipera pungat an
scorpio, cum uterque efficax sit ad nocendum. Non est humilitati parcendum
quam necessitas peperit, non uoluntas: multi enim imaginariam
induunt humilitatem, cum non possint ad libitum superbire.
Vel:
Illa demum subiectio fauoralis inuenitur, que supplicat non coacta. Vel:
Verbum subiectionis ueniam non meretur, nisi eam condiat sincera deuotio
supplicantis.

13. EXORDIUM INVITANTIUM AD SCIENTIAM.
Item ad scientie fructum sic possumus exordialiter inuitare: Arbor
colitur et amatur fructifera, set habetur sterilis in despectu.
Vel: Vita sine
litteris mors est et uiui hominis sepultura.
Vel: Asinina ruditate putrescit
quem litterature radius non serenat.
Vel: Sero exit ad solem sapientie
qui sub umbra desidie marcidus insolescit.

14. EXORDIUM EXHORTANTIUM ALIQUOS UT IN COMMUNE PROSINT.
Item, ut alicuius sapientia prodeat in commune, sic possumus exordiri:
Omne bonum in commune deductum pulchrius elucescit. Vel: Aurum
dispersum, ut ait Seneca, pulchrius rutilat quam signatum.
Vel:
Nichil honoris retinent margarite latentes: que si ueniant ad usus humanos,
luce fulgurant gratiori.
Vel: Nisi sue thesauros sapientie dispersisset,
fama non predicaret hodie Salomonem.
Vel: Sua commendant organa filomenam,
et dispersa magistrorum scientia eis parit agmina titulorum.

15. IN CONTRARIUM VERO SIC:
Si gemme triuiatim et publice abundarent, cuilibet in tedium uerterentur.
Vel: Que raro in lucem prodeunt, et mirantibus alludunt animis et
dulcius oculis blandiuntur.
Vel: Sicut dilectione, sic scientia est utendum:

Torna all'inizio