Cancellario domini legati Bartolomeus de Capua logotheta et prothonotarius,
per Petrum Grassum de Neapoli.
Iustum credimus iusticiam facere, sed non reputamus iniustum rigorem
iusticie cum mansuetudinis equitate lenire, credimus siquidem clericos
Capuani capituli alicuius culpa dissolutionis obnoxios et pro lubrico fragilitatis
humane aliqua plectibili forsitan inquinatione notatos. Sed quia non
semper curantur ferro vel cauterio vulnera, immo interdum citius olei et
mitioris unguenti suavitate sanantur, reputamus provide facere censuram
iudicii pastoralis si, mitigato rigore, qui cruciat, gregem suum castigat et
corrigit misericordis discipline sarculo, qui non urit. Rogamus itaque sinceritatem
vestram, affectione qua possumus, ut clericos ipsos apud eundem
communem dominum legatum velitis, amore nostri, prout honeste poteritis,
ad equitatis et misericordie gratiam prosequi, non rigorem.
|
|