IN SECUNDUM SENTENTIARUM DISTINCTIO 43
DIVISIO TEXTUS
Postquam diversa genera peccatorum assignavit, in parte ista determinat de
quodam genere peccati quod ceteris aliis gravius invenitur, scilicet de peccato
in Spiritum Sanctum; et dividitur in partes duas: in prima ostendit gravitatem
huius peccati; in secunda quaerit quid sit istud peccatum, ibi: «Sed quaeritur,
quid sit illud peccatum in Spiritum Sanctum». Et dividitur in partes tres, secundum
tres assignationes huius peccati quas facit; secunda ibi: «Est et alia huius
peccati assignatio»; tertia ibi: «De hoc quoque peccato in Spiritum Sanctum
Ambrosius... definitam assignationem tradit». Prima dividitur in duas: in prima
ponit assignationem quamdam peccati in Spiritum Sanctum, magistralem; in
secunda movet quamdam quaestionem, et solvit, ibi: «Sed quaeritur, utrum
omnis obstinatio mentis in malitia obduratae, omnisque desperatio, sit peccatum
in Spiritum Sanctum».
«Est et alia huius peccati assignatio». Hic ponit secundam assignationem, ex verbis
Augustini sumptam; et primo ponit eam; secundo ex verbis eiusdem ostendit,
quomodo sit accipienda, ibi: «Illam tamen definitionem Augustinus in lib. Retract.
rememorans, aliquid adiiciendum ibi fore, nec asserendo se dixisse aperit».
«De hoc quoque peccato Ambrosius in lib. De Spiritu Sancto disserens definitam
assignationem tradit». Hic ponit tertiam assignationem secundum
Ambrosium: et primo ponit eam; secundo removet quoddam dubium quod potest
esse, ibi: «Non itaque distinctio illa verborum sic accipienda est».
|
|